1Pe 1 | MED | STEP | Na Pita, Jisas Kraist nga nombuⱡa rung wu. Na ndi, mon ei rop, enim Got nga wamp kat, mbi ropa, en enim nga mᵾi mang kona ila wak rok, mbuⱡ mbaⱡ nᵾk puk, kona Pontas, Galesiya, Kaparosiya, Eisiya na Bitiniya, kona mormin wamp kᵾⱡ kᵾn, mon rop ngunt.

1 Peter 1

Pita Nga Mon Kuimp Tepa Rurum Kᵾⱡ

1 Na Pita, Jisas Kraist nga nombuⱡa rung wu. Na ndi, mon ei rop, enim Got nga wamp kat, mbi ropa, en enim nga mᵾi mang kona ila wak rok, mbuⱡ mbaⱡ nᵾk puk, kona Pontas, Galesiya, Kaparosiya, Eisiya na Bitiniya, kona mormin wamp kᵾⱡ kᵾn, mon rop ngunt. 2 Enim Got Tipam ei ndi, unt kor nga pilpa pora ndupa, mbi ropa elim kᵾn rukᵾr titim. Muⱡnga Wingti ei ndi, enim etpa wamp wingti mbᵾ mundangga, Jisas Kraist nga ik ei, teng nduk tangina, wote elim nga mema ei ndi, enim ⱡumᵾi rangga. Got nga wamp poⱡ ti uⱡ, wote moⱡpa kundi uⱡ mbᵾ, enim nga ruk ting ila tepa, peka ropa kuimba kuⱡangga!

Tᵾn Kont Muⱡmin Uⱡ Ei, Muⱡ Kona Nokundpa Tetᵾm

3 Tᵾn pᵾtmᵾn ei, Got ndi tᵾn wi ropa, ruk rung titim ei, elim nga uⱡ eng nui tetᵾm ei kᵾn, wote elim nga uⱡ kun kai tetᵾm ila, kunda muⱡeimᵾn nimba itim. Ei nga, Got elim nga ronduⱡ ila, tᵾn uⱡ kun kai mbᵾ, elim pᵾtᵾm ei mel pep rᵾmin nimba, tᵾn mel minal ngurum. 4 Wote tᵾn ndi, Got elim nga wamp mbᵾ nga memp kai teing nimba tᵾndᵾtᵾm mbᵾ timin ei nga, nokundᵾp mormun. Memp kai ei, wi muⱡ kona tᵾndᵾtᵾm ei, purpa kit moⱡpa, wei ai iti natᵾtᵾm mon! 5 Enim Got kᵾn mondᵾk pilingina, wote elim nga ronduⱡ ei ndi, enim nokundᵾk nga molk kai mondunmin. Enim etpa tᵾmba uⱡ ei, muⱡ mᵾi raⱡ pora nimba ui ou ila, ekit omba ei nga tᵾpa kun etpa tetᵾm. 6 Uⱡ ei nga, numan kai pilik muⱡᵾi! Akup ya mᵾi kona ila ui onunga kᵾⱡ ila, oⱡa tᵾpa, kᵾni uⱡ mbila ou ndupa, mbun mindil tᵾnmᵾn. 7 Mbun mindil mbᵾ ndi, tᵾn nga mondpa pili orunga, ronduⱡ mbun kun kai muⱡmin, muna mon, ei tᵾn kanᵾmba orum. Tᵾn pᵾtmᵾn ni, ku gol pora nimba mel ei, ndip ila ruk nduk kalk, wote ekit tᵾtmin. Ei mel, tᵾn nga mondpa pili uⱡ ei, gol mel, kapⱡa mon! Ei nga, tᵾn nga mondpa pili uⱡ ei, ndip mel ila ruk mba, wote kai etpa ekit omba. Wote, Jisas Kraist omba pena ila moⱡmba ui ou ila, enim nga mondpa pili uⱡ ei, rom kaip, mbi ou ti uⱡ, tᵾpa ou ndui uⱡ mbᵾ, enim kapⱡa ting. 8 Enim Jisas kᵾni nakᵾndᵾrmin kep, enim nga numan ei, elim kᵾn tetmin. Enim akup elim kᵾni nakᵾnmin, wote mondpa pili uⱡ ei, ambulk mormin. Ei ndi, enim nga mondpa pili orunga, ting mel ei, tᵾnmin ei, min orunga etpa ti uⱡ ei, uⱡ i etᵾk, ambulk palk, numan ti elpa elinga mormin. 10 Painui wu kᵾⱡ ndi, etpa ti uⱡ ei nga ik puⱡ ei, etᵾp pilmin nᵾk pilik, kongundᵾk kurᵾk puk, wote Got nga wamp gem ui uⱡ ei, enim ngumba ei nga, ik pai nok nᵾtᵾng. 11 Ni kᵾn, etpa ti uⱡ ei, ui nant kᵾn omba, wote etpa omba mel nant, ik puⱡ ei nga kombulk pᵾtᵾng ku. Ui ei kᵾn, Kraist nga Muⱡnga ei, ik painui wu mbᵾ kᵾn, omba moⱡpa, Kraist wote omba, mindil nomba, mbi ou tᵾpa etmba ei nga, kuimp tepa Muⱡnga ei ndi, oⱡa tᵾpa unt nitim. 12 Got ndi, painui wu kᵾⱡ, en enim nga uⱡ ti enmin nᵾk, pili nᵾpᵾlᵾi nimba, para ndupa ngurum. Ei mon, akup enim wamp mormin kᵾⱡ nga ik nᵾndᵾtᵾng. Ei nombuⱡa rung wu mbᵾ ndi, Rᵾnang Ik Kai ei, muⱡ kona Muⱡnga Wingti tenda ei nga ronduⱡ ila ku, uⱡ mbᵾ nga nᵾk nguⱡungina pᵾnmᵾn. Wote anggelo mbᵾ, ndi kunda uⱡ mbᵾ pilip tamᵾn, ka nᵾk pᵾtmᵾn ku.

Enim Wamp Wingti Ralk Muⱡᵾi

13 Ei nga, enim nga numan orunga tᵾk kun mundᵾk, tᵾk mendᵾk muⱡᵾi! Enim nga numan tenda pendᵾk, Jisas Kraist omba pena ila moⱡum ei, Got nga pol ti uⱡ nᵾk nokundᵾk muⱡᵾi! 14 Unt enim pilik kun iti natᵾk, uⱡ kit mbila ki nguk, uⱡ kit mbᵾ nga numan nguk etᵾng. Uⱡ mbᵾ wak rok, akup Got nga kangambuⱡa ralk molk, elim nga ik ei teng ndᵾi! 15 Wote Got ndi, enim wi ropa rukᵾr tᵾpa, wamp wingti kᵾⱡ muⱡᵾi nᵾtᵾm. Ei mel uⱡ, namba uⱡ eng mbila, wamp wingti ralk muⱡᵾi! 16 Buk Wingti ei ndi, nimba mel,

“Na wingti mor ei mel, enim wingti ku muⱡᵾi!” nᵾtᵾm.
17 Enim Got kᵾn atinga rok, mbi tek, Wuta nᵾtmin ei ndi, wamp pora, en enim nga namba uⱡ etmin mbᵾ, to tenda ila mint kᵾmp tᵾtᵾm. Ei nga, ya mᵾi kona ila ui onunga monmᵾn kᵾⱡ ila, Got nga mundmong endᵾk, pek muⱡᵾi! 18 Enim pᵾtmin ni, unt enim nga anda kouwᵾ kᵾⱡ nga uⱡ kit mbo rondrᵾng uⱡ mbila, kandᵾk tᵾk pep rok morung. Ei kᵾn, namba mel ti ndi, enim etpa kan pilinga ndurum ei, pilik mormin. Ku gol, silpa mel mbᵾ nga ronduⱡ pi purum. Wote ei ndi, iti nᵾtᵾtᵾm mon! 19 Wote, Kraist nga mema ei, ronduⱡ minal petᵾm ei ndi, enim etpa titim. Kraist ei, kng sipsip waⱡ na ti, kᵾng nit pi nᵾpi, ni mel ku. 20 Unt Got ndi, mel kanmᵾn mbᵾ pora, mim iti nᵾti kᵾn, Kraist mbi ropa oⱡa tᵾpa, kongun ei tangga nitim. Akup ui pora ninim ila, enim nga nᵾndpa kᵾn, Kraist enim kᵾn etpa mot ndunᵾm. 21 Ei kᵾn, Kraist ndi, enim tᵾpa rapundᵾⱡnga, Got kᵾn mondᵾk pᵾnmᵾn. Got elim ndi, Kraist on kona ila ⱡoporpa oⱡa tᵾpa, mbi ou oⱡa orunga ngurum. Ei nga, enim Got mondᵾk pilik, omba tᵾmba ei nga numan kai pilik, kel rondᵾk nokundᵾk mormin.

22 Akup, enim ik kupa ei pilik tᵾk, pep rok enmin ei ndi, enim nga uⱡ kit mbᵾ, ⱡumᵾi roⱡnga, min orunga etᵾk kai mondunmin. Wote, enim nga mondpa pili wamp mormin mbᵾ, numan ngunmin. Ei mel ku, ronduⱡ mundᵾk angmᵾn mbᵾ pora, numan nguk muⱡᵾi! 23 Ei kᵾn, Got nga ik kont mba, uⱡ nga kᵾnt nga tetᵾm ik ila, enim rᵾng mbo na, ni mel kont paka mila rong. Enim kangambuⱡa kel mel, kokila meng kᵾⱡ, tipam ei, kuⱡi nakᵾrᵾm kont mba moⱡpa mint purum. 24 Buk Wingti ndi, ei nimba mel,

“Wamp mbᵾ pora, ᵾi ongum na mel penᵾm mbᵾ mel kapⱡa, Wote, wamp nga kᵾng orunga mel tetᵾm mbᵾ, ᵾi ongum kuk ronum ei mel kapⱡa. Wote, ᵾi ongum ei, korum ei kᵾn, elim nga kuk ropa, ekit ndurum ei, koⱡpa mana purum. 25 Wote, Nuim ei nga ik ei, uⱡ nga kᵾnt nga kont tepa mint purum,” nᵾtᵾm.
Ik ei, Rᵾnang Ik Kai int enim kᵾn, urum ik waⱡᵾm ei.